काठमाडौँ – नेपाली कांग्रेसका नेता प्रकाशशरण महतले सभापति गगन थापा नेतृत्वको संस्थापन पक्षले आफूअनुकूल हुने गरी पटक–पटक पार्टी विधान संशोधन गरेको आरोप लगाएका छन्।

पूर्वसभापति शेरबहादुर देउवा पक्षका नेता महतले महाधिवेशनको मुखमा विधान संशोधन गरेर पार्टीभित्र नेता व्यवस्थापन गर्न खोजिएको टिप्पणी गरे।

‘हरेक दिनजस्तो विधान संशोधन भएको छ। विशेष महाधिवेशनमा अर्कै विधान बनाइएको थियो, अहिले पुनः अर्कै भएको छ। आफूअनुकूल गगनजीले विधान संशोधन गरेर कांग्रेसलाई तहसनहस बनाइसक्नुभयो,’ महतले भने।

उनले विगतमा महाधिवेशनको मुखमा विधान संशोधन गर्न नहुने धारणा राख्दै आएका गगन थापाले अहिले आफैँ त्यस्तो अभ्यास गरिरहेको आरोप लगाए।

‘विगतमा उहाँ नै भन्नुहुन्थ्यो, महाधिवेशनको मुखमा विधान संशोधन गर्न पाइँदैन भनेर। अहिले उहाँ नै नेता व्यवस्थापन गर्नका लागि अनेक प्रपञ्च रचिरहनुभएको छ,’ महतले भने।

महतले नयाँ नेतृत्वले कांग्रेसलाई एकताबद्ध बनाउनेमा आफू विश्वस्त नरहेको पनि बताए।

‘नेतृत्वले कांग्रेस एक बनाउँछ जस्तो चाहिँ मलाई लागेको छैन,’ उनले भने।

महतले कांग्रेसको महाधिवेशन आफूले मिस नगरेको तर महाधिवेशनमा सहभागी आफ्ना साथीभाइलाई भने सम्झिरहेको बताए।

महतसँग यस विषयमा थप कुराकानी केही समयपछि सार्वजनिक हुने छ।