काठमाडौं– बलिउडको चर्चित जोडी कियारा आडवाणी र सिद्धार्थ मल्होत्राको घरमा फेरि खुसीको खबर आएको छ । अभिनेत्री कियारा र अभिनेता सिद्धार्थले आफूहरू दोस्रो सन्तानको आमाबुवा बन्न लागेको जानकारी सामाजिक सञ्जालमार्फत दिएका छन् ।

दुवैले संयुक्त रूपमा एउटा भावुक तस्बिर सार्वजनिक गर्दै यो खुसी बाँडेका हुन् । तस्बिरमा कियारा र सिद्धार्थको हातसँगै सानो बच्चाको मोजा तथा उनीहरूको पहिलो सन्तान छोरी सरायाहको हात देखिन्छ । तस्बिरसँगै उनीहरूले लेखेका छन्, ‘सबैभन्दा ठूलो उपहारका रूपमा फेरि एकपटक धन्य भएका छौँ। हाम्रो मन प्रेम र कृतज्ञताले भरिएको छ।’

यो खबर सार्वजनिक भएसँगै उनीहरूलाई बलिउडकर्मी तथा प्रशंसकहरूले बधाई दिइरहेका छन् । कियारा र सिद्धार्थले सन् २०२३ को फेब्रुअरीमा विवाह गरेका थिए । 

विवाहको करिब दुई वर्षपछि सन् २०२५ मा उनीहरूले पहिलो सन्तानका रूपमा छोरी सरायाहलाई स्वागत गरेका थिए । छोरीको जन्मपछि पनि दुवैले उनको व्यक्तिगत जीवनलाई सार्वजनिक चर्चाबाट टाढै राख्दै आएका छन्।

विशेषगरी सरायाहको तस्बिर र पारिवारिक जीवनसँग सम्बन्धित विषयमा यो जोडी निकै सतर्क देखिन्छ । सामाजिक सञ्जालमा समेत उनीहरूले छोरीबारे सीमित जानकारी मात्र साझा गर्दै आएका छन् ।

कामको कुरा गर्दा दुवै कलाकार बलिउडमा सक्रिय छन् । कियारा पछिल्लो समय यशसँगको फिल्म ‘टक्सिक’मा देखिएकी थिइन् भने सिद्धार्थको पछिल्लो फिल्म ‘द भ्वान’ हो । यसबीच परिवारमा नयाँ सदस्यको आगमनको खबरले उनीहरूको व्यक्तिगत जीवनमा अर्को खुसीको अध्याय थपिएको छ ।