काठमाडौं । राष्ट्रिय स्वतन्त्र पार्टी (रास्वपा) का सांसद अमरेशकुमार सिंहले जेन्जी आन्दोलनका सहिदको मञ्चमा विवादित धर्मगुरुहरूलाई अगाडि राखेर मन्त्रीहरूलाई पछाडि राखिएको भन्दै सरकारको आलोचना गरेका छन् ।

सांसद सिंहले सरकारले जेन्जी सहिदको सम्मान गर्ने कार्यक्रममा विवादित धर्मगुरुहरूलाई प्राथमिकता दिएर संविधान र समावेशिताको मर्ममाथि नै प्रश्न उठाउने काम गरेको आरोप लगाएका छन् ।

उनले सामाजिक सञ्जालमार्फत प्रश्न गर्दै भनेका छन्, ‘विवादित धर्मगुरुहरूलाई जेन्जी सहिदको मञ्चमा अगाडि राखेर मन्त्रीहरूलाई पछाडि राखेर सरकारले के भन्न खोजेको छ ?’

सिंहले यस्तो व्यवस्थाले संविधान र समावेशी व्यवस्थाको धज्जी उडाउने काम भएको दाबी गरेका छन् । देशका लागि सही काम गर्ने तथा योगदान पुर्‍याउने व्यक्तिहरूलाई पाखा लगाएर विवादमा रहेका व्यक्तिहरूलाई अगाडि सार्नुले सरकारको प्राथमिकतामाथि नै प्रश्न उठाएको उनको भनाइ छ ।

उनले सरकार आफ्नै निर्णयमा टिक्न नसकेको र पटक–पटक विवादमा पर्ने काम गरिरहेको आरोपसमेत लगाए । सरकारका पछिल्ला निर्णय र गतिविधिले जनतामा गलत सन्देश जाने भन्दै सिंहले यस्तो कार्यलाई छुट दिन नसकिने चेतावनी दिएका छन् ।

‘संविधान, समावेशीताको धज्जी उडाउने र देशका लागि सही काम गर्नेहरूलाई पाखा लगाउने यो सरकार के सन्देश दिन खोजेको छ ?’ सिंहले प्रश्न गरेका छन् ।

उनका अनुसार सरकारका सार्वजनिक कार्यक्रम तथा निर्णयहरू संविधानको भावना, समावेशिता र जनताको अपेक्षाअनुकूल हुनुपर्नेमा त्यसविपरीत गतिविधि भइरहेको छ । विवादित व्यक्तिहरूलाई प्राथमिकता दिने र आफ्नो निर्णयमा स्थिर रहन नसक्ने प्रवृत्तिले सरकारप्रतिको विश्वास कमजोर बनाउने उनको तर्क छ ।

सिंहले आफ्नै निर्णयमा टिक्न नसक्ने तथा विवादै विवादमा पर्ने गतिविधि गरिरहेको सरकारलाई त्यस्ता कामका लागि छुट नरहेको बताएका छन् । उनले सरकारका गतिविधिमाथि निरन्तर प्रश्न उठाउँदै जवाफदेही बन्नसमेत आग्रह गरेका छन् ।