काठमाडौं- गृहमन्त्री सुधन गुरुङले तीन-चार जना पत्रकारलाई सुध्रिन चेतावनी दिएका छन् । नयाँ बानेश्वरस्थित पुरानो संसद भवनमा आयोजित जेन-जी सहिद दिवसको कार्यक्रमलाई सम्बोधन गर्दै उनले यस्तो चेतावनी दिएका हुन् ।

आन्दोलनका क्रममा जोखिम मोलेर काम गर्ने र घाइते भएका पत्रकारप्रति उच्च सम्मान रहेको उल्लेख गर्दै गृहमन्त्री गुरुङले केही पत्रकारलाई लक्षित गरी सुध्रिन आग्रह गरेका हुन् । उनले ती तीन चार जना पत्रकारको नाम भने लिएनन् ।

सम्बोधनका क्रममा उनले भाद्र २३ गतेको आन्दोलनमा ज्यान गुमाएका सहिद, घाइते र उनीहरूका परिवारप्रति ऐक्यबद्धता जनाउँदै आफूले पाएको मन्त्री पद सत्ता र शक्तिको घमण्ड नभई जनताले दिएको ठूलो जिम्मेवारी भएको बताए ।

पुराना राजनीतिक दलहरूलाई इतिहास फेर्ने कोसिस नगर्न चेतावनी दिँदै उनले आफूहरू सत्ताको लोभमा नभई सुशासनका लागि आन्दोलनमा उत्रिएको स्पष्ट पारे । भ्रष्टाचारविरुद्ध शून्य सहनशीलता अपनाउने प्रतिबद्धता जनाउँदै उनले भ्रष्टाचार भएको थाहा पाए आफू तीन करोड जनताका तर्फबाट लड्ने दाबी गरे ।

नयाँ पुस्ताको यो सरकार परम्परागत संस्कार बदल्न र जनताको सेवा गर्न आएको उल्लेख गर्दै उनले कुनै पनि हालतमा परिवर्तनको आशा मर्न नदिने बताए । साथै, सुरक्षा निकायलाई कुनै राजनीतिक दबाब नदिई निष्पक्ष रूपमा काम गर्न स्वतन्त्र छाडिएको जानकारी गराउँदै उनले सुरक्षाकर्मीहरूको मनोबल उच्च राख्दै देश निर्माणको यात्रामा निरन्तर लागिपर्ने प्रतिबद्धता व्यक्त गरे ।