भक्तपुर – नेपाली कांग्रेसका सभापति गगनकुमार थापाले केन्द्रीय कार्यसमितिको बैठकपछि पार्टीको महाधिवेशन प्रक्रिया अघि बढ्ने बताए।

स्वर्गीय श्यामबहादुर कार्कीको १९औँ स्मृति दिवसका अवसरमा भक्तपुरमा आयोजित रक्तदान कार्यक्रममा बोल्दै सभापति थापाले साउन २४ गतेदेखि सुरु हुने केन्द्रीय कार्यसमिति बैठकपछि महाधिवेशनको प्रक्रिया अघि बढाइने जानकारी दिएका हुन्।

सभापति थापाले कांग्रेसलाई आफ्नो मौलिक इतिहास, त्याग र संघर्षको जगमा फर्काउँदै नयाँ ढंगले अघि बढाउनुपर्ने बताए। उनले कांग्रेसलाई सत्ता र शक्ति आवश्यक भए पनि सिद्धान्तसँग सम्झौता गरेर प्राप्त हुने सत्ताको कुनै अर्थ नरहेको धारणा राखे।

उनले सेवा भावना र नागरिकका अधिकारका लागि गरिने राजनीति अहिलेको आवश्यकता भएको बताए।

बीपी कोइराला, गणेशमान सिंह र कृष्णप्रसाद भट्टराईजस्ता कांग्रेसका शीर्ष नेताहरूले पद र सत्ताका लागि आफ्नो सिद्धान्तसँग कहिल्यै सम्झौता नगरेको स्मरण गर्दै सभापति थापाले त्यही राजनीतिक आदर्शलाई आत्मसात् गर्नुपर्नेमा जोड दिए ।

कार्यक्रममा विद्यार्थीहरूलाई स्कुल ब्याग तथा स्टेशनरी सामग्रीसमेत वितरण गरिएको थियो।