काठमाडौं– चौधरी ग्रुप (सीजी) ले म्यारियट इन्टरनेशनलसँग काठमाडौंमा दुई नयाँ लक्जरी होटल सञ्चालन गर्ने सम्झौता गरेको छ ।

आइतबार सम्पन्न सम्झौताअनुसार काठमाडौंमा ‘द रिट्ज–कार्लटन काठमाडौं’ र ‘द वेस्टिन काठमाडौं’ सञ्चालनमा ल्याइने छ । यी दुवै होटल सन् २०३१ सम्म सञ्चालनमा ल्याउने लक्ष्य राखिएको छ ।

सम्झौतासँगै म्यारियटको नेपालस्थित पोर्टफोलियोमा करिब ३०० नयाँ ‘की’ थपिनेछन्। रिट्ज–कार्लटन ब्रान्ड पहिलोपटक नेपाल भित्रिन लागेको हो ।

ठमेल क्षेत्रमा निर्माण हुने रिट्ज–कार्लटन काठमाडौंमा १५० कोठा, ३० सुइट, पाँच रेस्टुरेन्ट तथा बार, स्पा, फिटनेस सेन्टर र सम्मेलन सुविधा रहनेछ। त्यस्तै, वेस्टिन काठमाडौंमा १५० प्रिमियम कोठा तथा सुइट, स्पा, रूफटप स्विमिङ पुल र आधुनिक बैठक तथा बैंक्वेट सुविधा रहने जनाइएको छ ।

सीजीका अनुसार यी परियोजनाले नेपालको पर्यटन प्रवर्द्धन, रोजगारी सिर्जना र आर्थिक गतिविधिमा महत्वपूर्ण योगदान पुर्‍याउने अपेक्षा गरिएको छ ।

होटलहरू चौधरी ग्रुप, आईईजी ग्रुप, आईजे ग्रुप र शर्मा एन्ड कम्पनीको साझेदारीमा निर्माण हुनेछन् ।