ढाका: बंगलादेशमा दादुरा र यससँग मिल्दाजुल्दा लक्षणका कारण झण्डै तीन सय जनाको ज्यान गएको छ । दादुराजन्य लक्षणका कारण गत मार्चको मध्यदेखि हालसम्म मृत्यु हुनेको संख्या २९४ पुगेको छ । पछिल्ला दिनहरुमा त्यहाँ थप १० जना बालबालिकाको मृत्यु भएको छ ।

स्वास्थ्य सेवा महानिर्देशनालयको पछिल्लो प्रतिवेदन अनुसार कुल संक्रमितको संख्या ४५ हजार ८०० नाघेको छ । राजधानी ढाका यस प्रकोपबाट सबैभन्दा बढी प्रभावित भएको छ । त्यहाँ मात्रै १४९ जनाको ज्यान गइसकेको छ । ग्रामीण क्षेत्रका बिरामीहरू राम्रो उपचार र आईसीयू सुविधाका लागि ढाका आउने क्रम बढ्दो छ ।

दादुराको गम्भीर प्रकोप फैलिएपनि त्यहाँ परीक्षण किटको चरम अभाव देखिएको छ । विश्व स्वास्थ्य संगठन (डब्ल्यूएचओ) का अनुसार बंगलादेशका ६४ मध्ये ५८ जिल्लामा यो संक्रमण फैलिसकेको छ । यसले देशभर नै दादुराको तीव्र संक्रमण भएको संकेत गर्छ ।

स्थिति नियन्त्रणमा लिन स्वास्थ्य मन्त्रालयले विशेष खोप अभियान सुरु गरेको छ । गत अप्रिल महिनादेखि यता १ करोड ६२ लाखभन्दा बढी बालबालिकालाई खोप लगाइएको छ । सन् २०२४ र २०२५ को बीचमा देशव्यापी रूपमा खोपको अभाव भएको थियो। त्यसैले खोप कभरेज घट्न गई अहिले यो महामारी फैलिएको डब्ल्यूएचओले जनाएको छ ।

दादुरा एक अत्यधिक संक्रामक भाइरसजन्य रोग हो । यसले मुख्यगरी बालबालिकाहरूलाई बढी असर गर्छ । कुपोषित र खोप नलगाएका बालबालिकामा यसले निमोनिया र मस्तिष्क सुन्निने जस्ता गम्भीर समस्या निम्त्याउन सक्छ । यसले गर्दा बिरामीको ज्यान समेत जाने गर्छ । विश्वभर खोपद्वारा रोकथाम गर्न सकिने बाल मृत्युदरको मुख्य कारणमध्ये दादुरा अझै पनि एक प्रमुख कारण हो ।