वाशिङ्टन-अमेरिकी राष्ट्रपति डोनाल्ड ट्रम्पले अमेरिका र इरानबीच युद्ध रोक्ने तथा परमाणु कार्यक्रमसम्बन्धी सहमति नजिक पुगेको दाबी गरेका छन्। उनले वार्ता असफल भए पुनः बमबारी हुन सक्ने चेतावनी पनि दिएका छन्।

यसअघि बुधबार अमेरिकी वेबसाइट एक्सियोसले इरानले ४८ घण्टाभित्र युद्धविराममा सहमति जनाउन सक्ने रिपोर्ट सार्वजनिक गरेको थियो। तर इरानले त्यसबारे कुनै स्पष्ट प्रतिक्रिया दिएको छैन।

इरानी विदेश मन्त्रालयका प्रवक्ता इस्माइल बाघेईले सम्झौता नजिक पुगेको भन्ने समाचारलाई अतिरञ्जित भएको बताएका छन्। उनका अनुसार इरानले अमेरिकी प्रस्तावमा औपचारिक जवाफ दिएको छैन, तर पाकिस्तानमार्फत संवाद जारी छ।

इरानी सञ्चारमाध्यमहरूले अमेरिकी प्रस्तावमा स्वीकार गर्न नसकिने केही शर्तहरू रहेको दाबी गरेका छन्। यद्यपि ती शर्तहरू के हुन् भन्ने खुलाइएको छैन।

इरानी संसद्को विदेश मामिला समितिका प्रवक्ता इब्राहिम रेझाईले उक्त प्रस्तावलाई ‘अमेरिकाको विशलिस्ट’ को संज्ञा दिएका छन्।

उता अमेरिकाले मे ४ मा होर्मुज जलडमरूमध्यमा जहाज आवतजावत सुरक्षित बनाउन ‘प्रोजेक्ट फ्रीडम’ सुरु गरेको थियो। तर एक दिनमै राष्ट्रपति ट्रम्पले उक्त अभियान रोक्न आदेश दिएका थिए।