काठमाडौं- पाकिस्तानमा १९ वर्षीया महिलामाथि गुडिरहेको भ्यानभित्र सामूहिक बलात्कार भएको छ । रवात प्रहरीको क्षेत्राधिकारभित्र पर्ने बागा शेखन क्षेत्रमा चार जना पुरुषले उनीमाथि यो जघन्य अपराध गरेका हुन् ।

प्रहरीले घटनामा संलग्न अभियुक्तहरूको खोजीका लागि विशेष टोली गठन गरी छापा मार्न सुरु गरेको छ । पीडित महिलाको स्वास्थ्य परीक्षणको काम भइरहेको छ ।

पीडितकी आमाले आइतबार प्रहरीमा जाहेरी दर्ता गराएकी छिन् । ती महिला आफ्ना दुई सन्तानका लागि इदको लुगा किन्न बजार निस्किएकी थिइन् । यात्राका क्रममा उनले रावत बजार जानका लागि एउटा भ्यान चढेकी थिइन् । भ्यानका कन्डक्टरले ढोका थुनेर उनलाई नियन्त्रणमा लिएका थिए । पछि उनलाई अर्को भ्यानमा सारेर बलात्कार गरेको जाहेरीमा उल्लेख छ ।

अभियुक्तहरूले गुडिरहेको भ्यानभित्रै पालैपालो बलात्कार गरेका थिए। घटनापछि अभियुक्तहरूले भिडियो खिचेर उनलाई धम्की समेत दिएका थिए। प्रहरीले यसबारे थप अनुसन्धान गरिरहेको छ ।