काठमाडौं– सरकारले राष्ट्रिय योजना आयोगको उपाध्यक्षमा डा. गुणाकर भट्टलाई नियुक्त गरेको छ । मंगलबार बसेको मन्त्रिपरिषद् बैठकले भट्टलाई नियुक्त गर्ने निर्णय गरेको हो ।

भट्ट लामो समयसम्म नेपाल राष्ट्र बैंकमा कार्यरत रहेर कार्यकारी निर्देशक पदबाट रिटायर्ड भएका थिए ।

उनको जन्म डोटीको शिखर नगरपालिका वडा नं. १ मा भएको हो । उनी २५ वर्ष देखि नेपाल राष्ट्र बैंकमा कार्यरत भएर अवकाशमा गएका थिए।

राष्ट्र बैंक आर्थिक अनुसन्धान विभागको प्रमुखका रूपमा पनि काम गरेका उनले बैंक नियमन बिभाग, सुपरिवेक्षण विभाग, भुक्तानी प्रणाली विभाग र राष्ट्र ऋण व्यवस्थापन विभाग प्रमुख भएर काम गरेका थिए । उनले लामो समय बैंकको प्रवक्ताको जिम्मेवारी पनि सम्हाले ।

डा. भट्टले अमेरिकाको विलियम्स कलेजबाट मास्टर्स र अमेरिकाको वयन स्टेट युनिभर्सिटीबाट अर्थशास्त्रमा विद्यावारिधि उपाधि हासिल गरेका थिए ।

त्रिभुवन विश्वविद्यालयबाट मास्टर्समा स्वर्ण पदक जितेका उनको अनुसन्धान क्षेत्र मौद्रिक अर्थशास्त्र, वित्तीय अर्थशास्त्र, र विकास अर्थशास्त्रमा केन्द्रित छ।

उनले विभिन्न राष्ट्रिय र अन्तर्राष्ट्रिय जर्नलहरूमा अनुसन्धान लेखहरू प्रकाशित पनि गरेका छन्। डा. भट्ट नेपाल राष्ट्र बैंकमा कार्यरत रहँदा बैंकिङ सुपरिवेक्षण, भुक्तानी प्रणाली सुधार, र मौद्रिक नीतिहरूको विकासमा योगदान दिए।

उनको नेतृत्वमा आर्थिक अनुसन्धान विभागले नेपालका आर्थिक सूचकहरूको विश्लेषण र पूर्वानुमानमा महत्वपूर्ण भूमिका खेलेको थियो । अर्थशास्त्रको व्यावहारिक पक्षको राम्रो ज्ञान भएका उनलाई अब बालेन्द्र शाह नेतृत्वको सरकारले देशको समग्र नीति योजनाको जिम्मेवारी सुम्पिएको हो।