काठमाडौं– झापाका पाँचवटै प्रतिनिधिसभा निर्वाचन क्षेत्रमा राष्ट्रिय स्वतन्त्र पार्टी (रास्वपा) का उम्मेदवारले अग्रता कायम राखेका छन्। अन्तिम मतपरिणाम नजिकिँदै जाँदा जिल्लाभर सुरक्षा व्यवस्था कडा बनाइएको छ।

अहिलेसम्मको मतगणनाको प्रवृत्ति हेर्दा रास्वपाका उम्मेदवारहरू विजय नजिक पुगेका देखिएका छन्। क्षेत्र नम्बर १ मा निशा डाँगी, क्षेत्र नम्बर २ मा इन्दिरा राना, क्षेत्र नम्बर ३ मा प्रकाश पाठक, क्षेत्र नम्बर ४ मा शम्भु सुस्केरा र क्षेत्र नम्बर ५ मा बालेन्द्र शाह अग्रस्थानमा छन्।

अन्तिम परिणाम सार्वजनिक हुने चरणमा पुगेपछि सम्भावित सुरक्षा चुनौतीलाई ध्यानमा राख्दै प्रशासनले सुरक्षा व्यवस्था थप कडा बनाएको जनाएको छ।

जिल्ला प्रहरी कार्यालयका अनुसार मतगणना स्थल र आसपासका क्षेत्रमा नेपाल प्रहरीसँगै नेपाली सेनासमेत परिचालन गरिएको छ। मतगणना केन्द्र वरपर निगरानी बढाइएको छ भने सुरक्षाकर्मीको उपस्थिति पनि उल्लेख्य रूपमा बढाइएको छ।

यसैबीच झापाबाट प्रतिनिधिसभा सदस्यका रूपमा प्रतिस्पर्धामा रहेका राष्ट्रिय प्रजातन्त्र पार्टीका अध्यक्ष राजेन्द्र लिङ्देन र नेकपा एमालेका अध्यक्ष केपी शर्मा ओली पराजय नजिक पुगेको मतपरिणामको प्रवृत्तिले देखाएको छ।