काठमाडौं- पाकिस्तानले हरेक वर्ष फेब्रुअरी ५ का दिनलाई कश्मीर ऐक्यबद्धता दिवस भनेर मनाउँदै आएको छ । पाकिस्तानले कश्मीरी जनताको अधिकारका पक्षमा यो दिवस मनाउने भनेपनि सरसर्ती हेर्दा यो राज्यप्रायोजित प्रचारमात्रै देखिन्छ ।

यसै पृष्ठभूमिमा संयुक्त कश्मीर जन राष्ट्रिय पार्टी यूकेपीएनपीले पाकिस्तान अधिनस्थ जम्मु कश्मीरमा पाकिस्तानी राज्यको नीतिविरुद्ध कडा आलोचना गरेको छ । पार्टीले गिल्गिट बाल्टिस्तान र पाकिस्तान अधिनस्थ जम्मु कश्मीरका जनतामाथि पाकिस्तानले दमन गरिरहेको आरोप लगाएको छ ।

भिडियो सन्देश जारी गर्दै पार्टीका विदेश मामिला समितिका अध्यक्ष जामिल मकशुदले पाकिस्तानको गतिविधिबाट ऐक्यबद्धता शब्दको धज्जी उडेको टिप्पणी गरेका छन् । एकातिर पाकिस्तानी राज्यले कश्मीरी जनतामाथि दमन गरिरहेको र अर्कोतर्फ ऐक्यबद्धताको नाटक मञ्चन गरिरहेको उनको भनाइ छ ।

भिडियो सन्देशमा उनले अधिनस्थ जम्मु कश्मीर र गिल्गिट बाल्टिस्तानबाट पछि हट्न पनि पाकिस्तान सरकारसँग आग्रह गरेका छन् । उनले यस विषयमा अन्तर्राष्ट्रिय समुदायलाई कूटनीतिक पहल गर्न समेत आह्वान गरेका छन् ।