काठमाडौं- पाँच वर्षभन्दा कम समयमा भारतले ५० अर्ब अमेरिकी डलर बराबरको आईफोन निर्यात गरेको छ । सन् २०२१ मा आईफोन निर्माता अमेरिकी कम्पनी एप्पलले उत्पादन प्रवर्द्धनमुखी भारतीय कार्यक्रममा सहभागिता जनाएयता ५० अर्ब डलर बराबरको आईफोन निर्यात गरिसकेको छ ।

इकोनोमिक टाइम्सका अनुसार आर्थिक वर्ष सन् २०२५–२६ को पहिलो नौ महिनामा मात्रै भारतबाट १६ अर्ब डलर बराबरको आईफोन निर्यात भएको छ । भारतबाट निर्यात हुने प्रायः सबै आईफोन अमेरिकी बजारमा पुग्ने गरेको छ ।

समाचारमा जनाइएअनुसार भारतले उत्पादन गर्ने ९७ प्रतिशत आईफोन अमेरिका पुग्छन् । हाल विश्वभर उत्पादन हुने ५ मध्ये एउटा आईफोन भारतमै बन्ने गरेको छ ।

एप्पल कम्पनीले भारत सरकारले लागू गरेको उत्पादन प्रवर्द्धनमुखी कार्यक्रम (पीएलआई) बाट मनग्य लाभ लिइरहेको जनाइएको छ । आर्थिक वर्ष सन् २०२१–२२ मा एप्पलले स्थानीय उत्पादन साझेदारसँग मिलेर यस कार्यक्रममा सहभागिता जनाएको थियो ।

यस कार्यक्रमबाट दक्षिण कोरियाली कम्पनी सामसुङले पनि लाभ लिइरहेको जनाइएको छ । आर्थिक वर्ष सन् २०२१–२२ देखि सन् २०२४–२०२५ सम्म सामसुङले भारतबाट १७ अर्ब अमेरिकी डलर बराबरको स्मार्टफोन निर्यात गरेको छ ।