काठमाडौं । रुसी मिसाइल र ड्रोन आक्रमणका कारण युक्रेनमा तीनजना बालबालिकासहित कम्तीमा १२ जनाको मृत्यु भएको छ ।

रुसी मिसाइल र ड्रोनहरूले रातभरिदेखि बुधबारसम्म किभ र अन्य एक दर्जन युक्रेनी क्षेत्रहरूमा भारी बमबारी गरेका थिए । रुसको यो पछिल्लो प्रहारमा परी तीनजना बालबालिकासहित कम्तीमा १२ जना नागरिकको मृत्यु भएको र ४० भन्दा बढी घाइते भएको युक्रेनी अधिकारीहरूले बताएका छन् ।

युक्रेनका राष्ट्रपति भोलोदिमिर जेलेन्स्कीले रुसको यो आक्रमणलाई अत्यन्त ठूलो प्रहार भनेका छन् । हालैका हप्ताहरूमा रसियाली आक्रमणहरूले ऊर्जा पूर्वाधारका साथै रेल र सडक यातायातलाई निशाना बनाएपछि युक्रेनमाथि आक्रमणहरू बढेका छन् ।

जेलेन्स्कीले रुसी आक्रमणको पूर्वअनुमान गर्दै अघिल्लो दिननै गुप्तचर निकायहरूले रसियाले अत्यन्त ठूलो प्रहार गर्न लागेको भन्दै चेतावनी दिएका थिए । पूर्वजानकारीका वावजुत क्षति भने रोक्न सकेन । रुसी राष्ट्रपति भ्लादिमिर पुटिनको ७४औँ जन्मदिनको अवसर पारेर यो आक्रमण गरेकको बताइएको छ ।