काठमाडौं– बेनी-जोमसोम-कोरला सडक खण्डका अधिकांश स्थानमा पहिरो पन्छाएर ट्रयाक खोल्ने कार्य सम्पन्न भएको सडक विभागले जनाएको छ ।

सडक विभाग महानिर्देशकको सचिवालयका अनुसार असोज ८ देखि ११ गतेसम्म परेको अविरल वर्षाका कारण कालीगण्डकी नदीमा आएको बाढी र विभिन्न स्थानमा खसेको पहिरोले उक्त सडक खण्डका ५० भन्दा बढी स्थानहरूमा यातायात अवरुद्ध भएको थियो । 

हाल म्याग्दीको अन्नपूर्ण गाउँपालिका-६ पोखरेबगर र रघुगङ्गा गाउँपालिका-२ कुनौटा बाहेक अन्य सबै स्थानहरूमा पहिरो हटाई ट्रयाक खोल्ने काम सम्पन्न भइसकेको छ भने सडक स्तरोन्नतिको कार्य जारी छ ।

अवरुद्ध दुई स्थानहरूमध्ये पोखरेबगरमा कालीगण्डकी नदीले बगाएको पुलको एप्रोच सडक निर्माणका लागि ग्याबियन टो-वाल बनाई माटो भर्ने काम भइरहेको छ भने कुनौटामा एक्साभेटर प्रयोग गरी ट्रयाक खोल्ने प्रयास भइरहेको छ । 

भइरहेका मर्मत कार्यहरू सम्पन्न गरी आगामी सोमबारसम्ममा सवारी साधन पुनः सञ्चालनमा ल्याउन सकिने अपेक्षा गरिएको विभागले जनाएको छ ।