चितवन– काठमाडौँ जोड्ने मुख्य ‘लाइफलाइन’ सडकका रूपमा रहेको नारायणगढ–मुग्लिन सडकखण्डमा बढी भार बोकेका सवारीसाधनको निगरानी गर्ने एकमात्र तौल स्टेसन तीन महिनादेखि बिग्रिएको छ । 

भरतपुर महानगरपालिका–१ आँपटारीस्थित तौलपुल स्टेसन बिम भाँचिएर असार १२ देखि सञ्चालनमा नहुँदा सडक सुरक्षामा थप जोखिम बढेको छ ।

तौल गर्न नपाउँदा बढी भार बोकेका सवारीसाधनको आवागमनमा नियन्त्रण कमजोर भएको स्टेसनका कम्प्युटर अपरेटर सरोज रानाले बताए ।

तौल स्टेसन सञ्चालनमा हुँदा निर्धारित क्षमताभन्दा बढी भार बोकेका मालवाहक सवारीसाधनमाथि कारबाही हुने गरेको थियो । अहिले स्टेसन बिग्रिएपछि सडक सुरक्षासँगै सडकको आयु र यात्रुको सुरक्षामा समेत थप चुनौती देखिएको छ ।

नारायणगढ–मुग्लिन सडकखण्डमा पछिल्लो समय सडक भासिने तथा जोखिमयुक्त स्थान थपिँदै गएका छन् । सिमताल क्षेत्रमा सडक भासिएपछि यातायात एकतर्फी सञ्चालन गर्नुपरेको थियो । यसले यात्रु तथा सर्वसाधारणले लामो समयदेखि सास्ती खेप्नुपरेको छ ।

तौल स्टेसन सञ्चालनमा हुँदा यहाँ ट्राफिक प्रहरीको समेत नियमित उपस्थिति रहने गरेको थियो । स्टेसनमा प्रहरीको पोस्टिङका लागि समेत प्रतिस्पर्धा हुने गरेको भएपनि अहिले स्टेसन नै सञ्चालनमा नहुँदा ट्राफिक प्रहरीको उपस्थिति हटेको छ ।

नारायणगढ–मुग्लिन सडकमा दुर्घटना न्यूनिकरण तथा बढी भार बोकेका सवारीसाधन नियन्त्रण गर्ने उद्देश्यले सरकारले २०७७ सालमा एक करोड २१ लाख ७३ हजार ६६५ रूपैयाँ लागतमा तौलपुल निर्माण गरेको थियो । ८० टन क्षमताको १८ मिटर लामो तौलपुल स्टेसनमा भार क्षमता मापन गर्न इलेक्ट्रो–मेकानिकल कन्ट्रोल रूमको व्यवस्था थियो । 

तस्बिर : राजेन्द्र आचार्य/नेपाल फोटो लाइब्रेरी