काठमाडौँ – २४ वर्षदेखिको विश्वकप उपाधि खडेरी तोड्ने लक्ष्यका साथ प्रशिक्षक कार्लो एन्सेलोटीलाई अनुबन्ध गरेको ब्राजिलका लागि नर्वेसँगको २–१ को हार निकै पीडादायी बन्यो ।

विश्वकपमा ब्राजिल युरोपेली टोलीसँग नकआउट चरणमा लगातार छैटौँ पटक पराजित भएको हो । ब्राजिल यसअघि ३६ वर्षअघि (सन् १९९० मा) चिरप्रतिद्वन्द्वी अर्जेन्टिनासँग अन्तिम १६ मा १–० ले पराजित हुँदै क्वार्टरफाइनल पुग्न असफल भएको थियो ।

आइतबार राति मेटलाइफ स्टेडियममा भएको रोमाञ्चक खेलमा पाँच पटकको विजेता ब्राजिललाई २–१ ले स्तब्ध पार्दै नर्वेले इतिहासमै पहिलो पटक क्वार्टरफाइनलको यात्रा तय गरेको हो । पराजयसँगै ब्राजिल सन् १९९० पछि पहिलो पटक विश्वकपको अन्तिम १६ बाटै बाहिरिएको हो ।

खेलको तेस्रो मिनेटमै नर्वेका पाट्रिक बर्गले बललाई जाली चुमाए पनि त्यसअघि अफसाइड भएकाले गोलले मान्यता पाएन । सुरुवाती दबाबपछि ब्राजिलले पेनाल्टीको अवसर पाएको थियो, जहाँ क्रिस्टोफर अजेरले बक्सभित्र माथिअस कुन्हालाई लडाएका थिए । तर, निल्यान्डले उत्कृष्ट बचाउ गरे । त्यसपछि पनि निल्यान्डले भिनिसियस जुनियर र ग्याब्रिएल मार्टिनेलीका प्रहारलाई विफल पार्दै नर्वेको संकट टारेका थिए ।

पहिलो हाफमा खासै प्रभाव जमाउन नसकेका हालान्डले खेलको दोस्रो हाफमा भने आफ्नो जादु देखाए । ६७ औँ मिनेटमा नेयमार मैदान प्रवेश गरेपछि ब्राजिलियन समर्थक उत्साहित देखिए पनि खेलको नतिजा नर्वेको पक्षमा गयो । एन्ड्रियास स्चिएल्डेरुपको क्रसमा हालान्डले सानदार हेड गोल गर्दै नर्वेलाई सुरुवाती अग्रता दिलाएका थिए ।

खेलको ९० औँ मिनेटमा हालान्डले डिबक्सको किनाराबाट उत्कृष्ट प्रहार गर्दै नर्वेको अग्रता दोब्बर बनाए । इन्जुरी समयको दशौँ मिनेटमा क्यासेमिरोलाई कुहिनोले हानेपछि ब्राजिलले खेलको दोस्रो पेनाल्टी पायो, जसलाई नेयमारले गोलमा परिणत गरे पनि नर्वे २–१ ले विजयी भयो ।