बेइजिङ- इरानका विदेशमन्त्री अब्बास अराघची चीनको राजधानी बेइजिङ पुगेका छन् ।

यसअघि पाकिस्तान, ओमान र रसियाको भ्रमण गरिसकेका उनी बुधबार बेइजिङ पुगेका हुन् ।

उनले बेइजिङमा चिनियाँ विदेशमन्त्री वाङ यीसँग वार्ता गरेका छन् । यी दुई नेताको वार्तालाई महत्वपूर्ण मानिएको इरानी विदेशमन्त्रालयले जनाएको छ।

दुई देशबीचको वार्ताको मुख्य एजेन्डा युद्धविराम कायम राख्ने र होर्मुज जलमार्ग पुनः खोल्ने रहेको छ।

यस भेटवार्ता अमेरिकी राष्ट्रपति डोनाल्ड ट्रम्पको मे १४–१५ मा हुने चीन भ्रमणअघि भइरहेको छ ।

जहाँ उनको भेट चिनियाँ राष्ट्रपति शी चिनफिङसँग हुने तय छ। उक्त भेटमा व्यापार सम्झौतासँगै पश्चिम एशियाको अवस्था पनि प्रमुख विषय बन्ने अपेक्षा गरिएको छ।

चीनले एकातिर अमेरिकी नाकाबन्दीको आलोचना गर्दै आएको छ । अर्कोतर्फ होर्मुज बन्द राखेको विषयमा इरानमाथि पनि दबाब बढाइरहेको छ।

दुवै देशबीचको वार्ताले आगामी कूटनीतिक समीकरणमा महत्वपूर्ण प्रभाव पार्ने देखिएको छ।