नयाँ दिल्ली – सञ्जु सामसनको विष्फोटक ब्याटिङको मद्दतले इन्डियन प्रिमियर लिग (आईपीएल) को ४८ औं खेलमा चेन्नई सुपर किंग्सले दिल्ली क्यापिटल्समाथि ८ विकेटको सहज जित दर्ता गरेको छ ।

दिल्लीस्थित घरेलु मैदानमा टस जितेर पहिले ब्याटिङ रोजेको दिल्ली क्यापिटल्सले निर्धारित २० ओभरमा ७ विकेट गुमाउँदै १५५ रनको मध्यम योगफल तयार पारेको थियो । १५६ रनको लक्ष्य पछ्याएको चेन्नईले मात्र २ विकेट गुमाएर १७.३ ओभरमै लक्ष्य भेट्टायो ।

चेन्नईको जितमा नायक बनेका सामसनले ५२ बलमा अविजित ८७ रनको इनिङ खेले । उनी प्लेयर अफ द म्याच बने। चेन्नईले १५ बल बाँकी छँदै जित हात पारेपछि अंक तालिकामा आफ्नो स्थिति थप बलियो बनाएको छ ।

दिल्लीका लागि बलरले कसिलो बलिङ गर्न नसक्दा चेन्नईका ब्याटर हाबी भएका थिए । यो हारसँगै दिल्लीको प्लेअफ यात्रा थप चुनौतीपूर्ण बनेको छ ।

तालिकामा चेन्नईले १० खेल खेल्दा १० अंक जोडेको छ भने समान खेल खेलेको दिल्ली आठ अंकमा सीमित छ । चेन्नई तालिकाको छैटौं स्थानमा छ भने दिल्ली सातौ स्थानमा छ ।