काठमाडौँ- काठमाडौँ निर्वाचन क्षेत्र नम्बर १० को मतगणना कार्य जारी रहँदा राष्ट्रिय स्वतन्त्र पार्टी (रास्वपा) ले सुरुवाती चरणमै भारी अन्तर कायम गरेको छ। रास्वपाका उम्मेदवार प्रदीप विष्टले आफ्ना प्रतिस्पर्धीहरूलाई निकै पछि पार्दै अग्रता कायम गरेका हुन् ।

भर्खरै प्राप्त विवरण अनुसार विष्टले १२४३ मतका साथ विजयतर्फको यात्रा सुरु गरेका छन्। उनलाई पछ्याइरहेका नेपाली कांग्रेसका उम्मेदवार हिमाल कार्कीले २४६ मत प्राप्त गरेका छन्, जुन विष्टको तुलनामा निकै कम देखिएको छ ।

त्यस्तै, नेकपा (एमाले) का उम्मेदवार विनोद श्रेष्ठले १६७ मतका साथ तेस्रो स्थानमा चित्त बुझाएका छन् भने नेपाली कम्युनिष्ट पार्टीकी उम्मेदवार रुपा महर्जनको पोल्टामा २८ मत मात्रै परेको छ।

निर्वाचन अधिकृतको कार्यालयले गणना कार्यलाई व्यवस्थित र पारदर्शी बनाउन सुरक्षाको कडा प्रबन्ध मिलाएको छ ।