काठमाडौं- चीनमा आकस्मिक व्यवस्थापनमन्त्रीमाथि भ्रष्टाचारको आरोपमा अनुसन्धान शुरु भएको छ । चिनियाँ आकस्मिक व्यवस्थापनमन्त्री वाङ शिङ्शीमाथि ‘कानुन र अनुशासनको गम्भीर उल्लङ्घन’ गरेको आरोपमा भ्रष्टाचार शुरु भएको हो ।

यसबारे चीनको केन्द्रीय अनुशासन आयोगले थप विवरण भने सार्वजनिक नगरेको समाचार संस्था रोयटर्सले जनाएको छ । वाङ हाल सत्तारुढ चिनियाँ कम्युनिष्ट पार्टीको सचिव पदमा रहेको जनाइएको छ ।

सन् २०२२ मा पद सम्हाल्नुअघि ६३ वर्षीय वाङले राज्यसञ्चालित राष्ट्रिय ऊर्जा लगानी संस्थाको प्रमुखका रुपमा काम गरेका थिए ।

चीनमा बहालवाला मन्त्रीमाथि अनुसन्धानको घटना तुलनात्मक रुपमा दुर्लभ मानिन्छ । राष्ट्रपति बनेयता सी जिन्पिङले भ्रष्टाचारविरोधी विशेष अभियान सञ्चालन गर्दै आएका छन् । हालैमात्र चिनियाँ सैन्य आयोगका उपाध्यक्ष झाङ युशियाविरुद्ध पनि अनुसन्धान थालिएको थियो ।

कतिपय आलोचकले भने राष्ट्रपति सीले आफ्ना प्रतिस्पर्धीलाई परास्त गर्नका लागि भ्रष्टाचारविरोधी अभियानको दुरुपयोग गर्दै आएको आरोप लगाउने गरेका छन् ।