काठमाडौं- भारतले श्रीलंकालाई थप १० वटा बेलीब्रिज प्रदान गरेको छ । भारतको विदेश मन्त्रालयले विज्ञप्ति जारी गर्दै डिट्वा नामक आँधीबाट प्रभावित श्रीलंकालाई १० वटा नयाँ बेलीब्रिज प्रदान गरिएकोे जनाएको छ ।

उक्त परिमाणको बेलीब्रिज भारतको भिशाखापट्नम बन्दरगाहबाट श्रीलंकाको कोलम्बो बन्दरगाह पुर्‍याइएको छ । भारतीय नौसेनाको आइएनएस घडियालले उक्त सामग्री कोलम्बो पुर्‍याएको डेलीन्यूज श्रीलंकाले जनाएको छ ।

आँधीपछि पूर्वाधार पुनर्निमाणका लागि भारतले श्रीलंकालाई सहयोग प्रदान गरेको हो । यसअघि पनि भारतले श्रीलंकाका विभिन्न स्थानमा बेलीब्रिज निर्माण गरेर सहयोग गरेको छ ।

यसअघि भारतीय विदेशमन्त्री एस जयशङ्करले श्रीलंकाको भ्रमण गरी ४५ करोड अमेरिकी डलर बराबरको विशेष आर्थिक प्याकेज घोषणा गरेका थिए । आँधीपछि भारतले श्रीलंकालाई सहयोग गर्न अपरेशन सागर बन्धु नामक अभियान नै सञ्चालन गरेको छ ।