काठमाडौं– काठमाडौंको हाडीगाउँमा रहेको ऐतिहासिक सम्पदास्थलमा गहना पोखरीको पुनर्निर्माण कार्य तीव्र रूपमा अघि बढेको छ।

सम्पदा क्षेत्र संरक्षण तथा सहरी विकास कार्यक्रम अन्तर्गत काठमाडौं महानगरपालिकाको पहलमा पोखरी र आसपासको संरचना पुरानै शैलीमा पुनर्निर्माण भइरहेको हो। क्षमा पूजा सम्पन्न गरेपछि औपचारिक रूपमा काम सुरु गरिएको महानगरपालिकाले जनाएको छ।

करिब ५२ देखि ५५ लाख रुपैयाँको लागतमा गहना पोखरीलाई मौलिक स्वरूपमै संरक्षण र पुनर्निर्माण गरिनेछ। पुनर्निर्माणसँगै आसपासको क्षेत्रलाई व्यवस्थित बनाउने काम पनि अघि बढाइएको छ।

यस अन्तर्गत फुटपाथलाई फराकिलो बनाउने, परम्परागत फाल्चा निर्माण गर्ने, बालमैत्री क्षेत्र र हरियाली क्षेत्र विस्तार गर्ने तथा पर्यटकका लागि सहायताका केन्द्र स्थापना गर्ने योजना रहेको छ।

महानगरपालिकाका अनुसार पुनर्निर्माणपछि गहना पोखरी धार्मिक, सांस्कृतिक र पर्यटकीय दृष्टिले अझ आकर्षक सम्पदा स्थलका रूपमा विकास हुने अपेक्षा गरिएको छ।