काठमाडौं– नेकपा एमालेका अध्यक्ष केपी शर्मा ओलीले माघ ११ गते हुने राष्ट्रिय सभा निर्वाचनमा नेपाली कांग्रेस र नेपाली कम्युनिष्ट पार्टी (नेकपा) सँग पनि तालमेल हुन सक्ने संकेत गरेका छन्।

मंगलबार केन्द्रीय कार्यालय च्यासलमा बसेको सचिवालय बैठकमा ओलीलाई नेताहरूले आउँदै गरेका दुई चुनावमा सम्भावित तालमेल र गठबन्धनबारे सोधेका थिए ।

यी दुई चुनावमा एमालेको सम्भावित रणनीतिबारे प्रश्न उठेपछि ओलीले माघ ११ को राष्ट्रिय सभा निर्वाचनमा कांग्रेस अथवा नेकपासँग मिलेर जाने अवस्था भएको बताएका थिए ।

तर फागुन २१ गते हुन लागेको प्रतिनिधि सभा निर्वाचनमा भने विकसित राजनीति परिस्थिति हेरेर आफूहरूको रणनीति अगाडि बढाउनुपर्ने जवाफ बैठकमा ओलीले दिएका छन् ।

सचिवालय बैठकमा उनले भरसक प्रतिनिधिसभा निर्वाचनमा एमाले एक्लै प्रतिस्पर्धा गरेर जित्ने वातावरण सिर्जना गर्नुपर्ने बताएका थिए।

‘राष्ट्रिय सभाको सन्दर्भमा एमालेले कांग्रेस र नेकपासहित विचार मिल्ने शक्तिसँग मिल्ने निर्णय लिन्छ’, ओलीको भनाइबारे एक नेताले भने, ‘उहाँले प्रतिनिधि सभाबारे अहिले कुनै छलफल नभएको बताउनु भएको छ।’

बैठकमा ओलीले अहिलेलाई राष्ट्रियसभाको तयारी गरेर जानुपर्ने बताएका थिए । ‘अध्यक्षज्यूले बैठकमा अहिले राष्ट्रिय सभाको तयारी गरौँ, प्रतिनिधि सभामा गठबन्धन गर्ने या एक्लै जाने पछि कुरा गरौँ भन्नुभएको छ’, ती नेताले भने ।