काठमाडौं– नेपाल स्टक एक्सचेञ्ज लिमिटेड (नेप्से) को रिक्त प्रमुख कार्यकारी अधिकृत (सिइओ) पदका लागि चार जना उम्मेदवारको संक्षिप्त सूची सार्वजनिक गरिएको छ । 

अर्थ मन्त्रालयअन्तर्गतको प्रमुख कार्यकारी अधिकृत छनौट तथा सिफारिस समितिले सोमबार सूचना जारी गर्दै संक्षिप्त सूचीमा परेका उम्मेदवारहरूको नाम तथा उनीहरूको प्रस्तुतीकरण र अन्तर्वार्ताको तालिका सार्वजनिक गरेको हो ।

नेप्सेको रिक्त पदमा खुला प्रतिस्पर्धाबाट पदपूर्ति गर्नका लागि छनौट तथा सिफारिस समितिले साउन १२ गते आवेदन माग गरेको थियो । तोकिएको म्यादभित्र कूल आठ जना उम्मेदवारले आवेदन पेस गरेका थिए । 

प्राप्त आवेदनहरूमध्येबाट ‘नेपाल स्टक एक्सचेञ्ज लिमिटेडको प्रमुख कार्यकारी अधिकृत पदमा नियुक्तिका लागि सिफारिससम्बन्धी कार्यविधि, २०८३’ को दफा ६.२ बमोजिम चार जना उम्मेदवारको संक्षिप्त सूची तयार पारिएको समितिले जनाएको छ । संक्षिप्त सूचीमा अनिल राज पौडेल, नवराज सापकोटा, नारायण प्रसाद सापकोटा र प्रताप सुवेदी समावेश भएका छन् ।

संक्षिप्त सूचीमा परेका उम्मेदवारहरूको दोस्रो चरणको मूल्याङ्कनअन्तर्गत नेतृत्व क्षमता, कार्य योजनाको प्रस्तुतीकरण तथा अन्तर्वार्ता कार्यक्रम असोज २३ गते सिंहदरबारस्थित अर्थ मन्त्रालयमा हुने जनाइएको छ ।