काठमाडौं- काठमाडौंका सार्वजनिक स्थानमा तराई-मधेशका समुदाय लक्षित आपत्तिजनक नारा लेखेको आरोपमा एकजना पक्राउ परेका छन्।

मधेशवासी समुदायप्रित आपत्तिजनक अभिव्यक्ति लेखेर सामाजिक सद्भावमा खलल पुर्‍याउने तथा द्वन्द्व भड्काउने गतिविधिमा संलग्न रहेको आरोपमा प्रहरीले एकजनालाई नियन्त्रणमा लिएको हो।

जिल्ला प्रहरी परिसर काठमाडौंका अनुसार विभिन्न मितिमा सार्वजनिक स्थानमा मधेशवासी समुदाय लक्षित अभिव्यक्ति तथा ‘द्वन्द्व भड्काउने’ जस्ता शब्दहरू लेख्ने कार्यमा संलग्न व्यक्तिको खोजतलास गर्ने क्रममा प्रहरीले ३५ वर्षीय विशाल गुरुङलाई समातेको हो ।

जिल्ला प्रहरी परिसर काठमाडौं र प्रहरी वृत्त नयाँ बानेश्वरबाट खटिएको प्रहरी टोलीले आइतबार खोटाङको बाक्सिला घर भई काठमाडौं–३१ शङ्खमुल बस्दै आएका ३५ वर्षीय गुरुङलाई पक्राउ गरेको हो ।

उनलाई सार्वजनिक शान्ति खलल पार्न नहुनेसम्बन्धी कसुरमा प्रहरी वृत्त बानेश्वरबाट थप अनुसन्धान भइरहेको जिल्ला प्रहरी परिसर काठमाडौंका प्रवक्ता तथा सूचना अधिकारी दानबहादुर थापाले जानकारी दिएका छन्।