काठमाडौँ – प्रमुख पर्यटकीय क्षेत्र ठमेलमा एक युवतीमाथि दुर्व्यवहार गरेको आरोपमा प्रहरीले शालीन शाहलाई पक्राउ गरेको छ। जिल्ला प्रहरी परिसर काठमाडौँ र काठमाडौँ उपत्यका अपराध अनुसन्धान कार्यालयबाट खटिएको संयुक्त टोलीले शाहलाई कलङ्कीबाट पक्राउ गरेको हो।

पीडित युवतीले आफूमाथि ठमेलमा दुर्व्यवहार भएको भन्दै घटना सार्वजनिक गरेकी थिइन्। घटनाबारे जानकारी पाएलगत्तै प्रहरीले सूक्ष्म अनुसन्धान सुरु गर्दै संलग्न व्यक्तिको खोजी तीव्र पारेको थियो।

खोजतलासका क्रममा कलङ्कीमा लुकिछिपि बसिरहेको अवस्थामा शाहलाई नियन्त्रणमा लिइएको प्रहरीले जनाएको छ। पक्राउ परेका शाहमाथि थप अनुसन्धानका लागि जिल्ला प्रहरी परिसर काठमाडौँ राखिएको छ भने घटनाको थप कारण र विवरणबारे अनुसन्धान भइरहेको प्रहरीले जनाएको छ।