काठमाडौं – फिफा विश्वकप २०२६ मा उत्कृष्ट प्रदर्शन गरेर चर्चामा आएका केप भर्डेका गोलकिपर भोजिन्हालाई अमेरिकी क्लब इन्टर मियामीले अनुबन्ध गर्ने तयारी थालेको बताइएको छ ।

अन्तर्राष्ट्रिय सञ्चारमाध्यमहरूका अनुसार क्लबका सह-मालिक डेभिड बेकह्याम स्वयं अनुभवी गोलकिपर भोजिन्हालाई टोलीमा भित्राउने पक्षमा देखिएका छन् । विश्वकपमा उनको प्रभावशाली प्रदर्शनपछि मियामीले उनलाई प्राथमिकतामा राखेको जनाइएको छ ।

भोजिन्हाले विशेषगरी अर्जेन्टिनाविरुद्धको नकआउट खेलमा उत्कृष्ट गोलरक्षक प्रदर्शन गरेका थिए। उनले खेलभरि आठ महत्वपूर्ण बचाउ गर्दै केप भर्डेलाई अन्तिम समयसम्म प्रतिस्पर्धामा टिकाइराखेका थिए । यही प्रदर्शनपछि उनी विश्व फुटबलमा चर्चाको केन्द्र बनेका हुन् ।

३४ वर्षीय गोलकिपर हाल ुफ्री एजेन्टु भएकाले उनलाई अनुबन्ध गर्न इच्छुक क्लबले कुनै ट्रान्सफर शुल्क तिर्नुपर्ने अवस्था छैन । पोर्चुगलको क्लब जीडी चाभेससँगको उनको सम्झौता जुन ३०, २०२६ मा समाप्त भएको थियो ।

यदि इन्टर मियामीसँग सम्झौता टुंगिएमा भोजिन्हाले विश्व फुटबलका महान् खेलाडीमध्ये एक लियोनल मेसीसँग एउटै टोलीबाट खेल्ने अवसर पाउनेछन्। यसलाई उनको व्यावसायिक करिअरको सबैभन्दा ठूलो उपलब्धिमध्ये एक मानिएको छ ।

स्पेनिस खेल पत्रिका मार्का तथा अन्य अन्तर्राष्ट्रिय सञ्चारमाध्यमका अनुसार इन्टर मियामी र भोजिन्हाका प्रतिनिधिबीच प्रारम्भिक चरणको वार्ता सकारात्मक रूपमा अघि बढिरहेको छ । विश्वकप समाप्त भएलगत्तै सम्झौता प्रक्रिया अघि बढ्ने सम्भावना रहेको जनाइएको छ ।