वीरगञ्ज- भारत सरकारले नेपालका सुरक्षा निकायहरूको क्षमता अभिवृद्धिका लागि ७ हजारभन्दा बढी सुरक्षात्मक हेल्मेट हस्तान्तरण गरेको छ।

वीरगञ्जमा शुक्रबार आयोजित एक कार्यक्रममा भारतका महावाणिज्यदूत देवी सहाय मीणा ले नेपाल प्रहरीका वरिष्ठ प्रहरी उपरीक्षक (एसएसपी) शान्तिराज कोइरालालाई शुक्रबार ती हेल्मेट औपचारिक रूपमा हस्तान्तरण गरेका हुन्।

भारतको वीरगञ्जस्थित महावाणिज्य दूतावासका अनुसार उक्त सुरक्षात्मक सामग्रीले नेपालका कानुन कार्यान्वयन गर्ने निकायहरूको कार्यक्षमता तथा सुरक्षालाई थप सुदृढ बनाउन सहयोग पुग्ने अपेक्षा गरिएको छ।

कार्यक्रममा नेपाल र भारतबीचको सुरक्षा सहकार्य तथा द्विपक्षीय सम्बन्धलाई अझ मजबुत बनाउने विषयमा समेत जोड दिइएको थियो।

भारतले नेपालका विभिन्न सुरक्षा, स्वास्थ्य, शिक्षा तथा पूर्वाधार क्षेत्रमा सहयोग गर्दै आएको सन्दर्भमा यो सहयोगलाई दुई देशबीचको मैत्रीपूर्ण सम्बन्धको निरन्तरताका रूपमा हेरिएको छ।