काठमाडौं– स्वास्थ्य तथा खाद्य स्वच्छता मन्त्रालयले स्वास्थ्य क्षेत्रका विभिन्न निकायहरूमा रिक्त रहेका पदाधिकारी र सदस्य नियुक्तिका लागि सुरु गरेको आवेदन प्रक्रिया तत्कालका लागि स्थगित गरेको छ । 

मन्त्रालयले शुक्रबार सूचना जारी गर्दै २० जेठमा विभिन्न निकायका लागि माग गरिएको आवेदन रद्द गरेको जनाएको छ ।  मन्त्रालयले बीपी कोइराला मेमोरियल क्यान्सर अस्पताल, शहीद गंगालाल राष्ट्रिय हृदय केन्द्र र स्वास्थ्य बीमा बोर्डका पदाधिकारी र सदस्यका लागि आवेदन माग गरे पनि आवश्यक कागजातको विवरण सार्वजनिक गरेको थिएन । 

मन्त्रालयले स्थगनसम्बन्धी सूचना जारी गर्दै अर्को सूचना केही दिनमै प्रकाशित गर्नेसमेत जनाएको छ । यसअघि मन्त्रालयले रिक्त विभिन्न परिषद्हरूमा पदाधिकारी तथा सदस्यका लागि १० दिनभित्र दरखास्त दिन आह्वान गरेको थियो । 

तर, सूचना प्रकाशन गरेको दुई दिनसम्म पनि आवेदनका साथ पेस गर्नुपर्ने आवश्यक कागजात र मापदण्डको विवरण सार्वजनिक नगरेपछि अन्योल भएको थियो । 

सरकारले अध्यादेशमार्फत अघिल्ला नियुक्तिहरू खारेज गरेपछि स्वास्थ्य क्षेत्रका विभिन्न निकायमा १९३ पद रिक्त भएका थिए ।