काठमाडौं– नेपाली कांग्रेसले क्रियाशील सदस्यता अद्यावधिक गर्ने समयावधि अन्तिम पटकका लागि थप गरेको छ।

पार्टीको सदस्यता व्यवस्थापन केन्द्रीय समितिको बैठकले क्रियाशील सदस्यता अद्यावधिक गर्ने म्याद आगामी जेठ २८ गते राति १२ बजेसम्म कायम गर्ने निर्णय गरेको कांग्रेस केन्द्रीय कार्यालयका कार्यवाहक मुख्यसचिव कृष्णप्रसाद दुलालले जानकारी दिए।

कांग्रेसका अनुसार देशभर सदस्यता अद्यावधिकको काम उत्साहजनक रूपमा अघि बढिरहेको छ। तर विभिन्न तहबाट निर्धारित समयभित्र प्रक्रिया पूरा गर्न कठिनाइ भएको जानकारी आएपछि म्याद थप गर्ने निर्णय गरिएको हो।

कार्यवाहक मुख्यसचिव दुलालले विभिन्न तहबाट समय अपुग भएको गुनासो प्राप्त भएकाले सदस्यता व्यवस्थापन केन्द्रीय समितिको निर्णयअनुसार अन्तिम पटकका लागि समयावधि थप गरिएको बताए।

कांग्रेसले निर्धारित नयाँ समयसीमाभित्र आ–आफ्नो क्रियाशील सदस्यता अद्यावधिक गर्ने कार्य अनिवार्य रूपमा सम्पन्न गर्न सम्बन्धित सबै सदस्य तथा पार्टी संरचनालाई आग्रह गरेको छ।