काठमाडौं- जापानको मनोरञ्जन उद्योगमा ‘आइडल कल्चर’ को विशेष महत्व छ । फ्यानसँग गहिरो सम्बन्ध बनाउन जापानी कलाकार र एजेन्सीहरुले ठूलो लगानी र समय खर्च गर्छन् । जतिसक्दो धेरै फ्यान फलोइङ बढाउन कलाकारहरुबीच उदेकलाग्दो प्रतिस्पर्धा नै चल्ने गर्छ ।

हालै जापानी सञ्चारमाध्यमहरूले वाकायामा प्रान्तकी एक जना ‘अन्डरग्राउन्ड आइडल’ ले फ्यानहरुलाई काखी सुँघाउने गरेको समाचार छापेका छन् । हरिदा मात्सुमोतो नाम गरेकी ती कलाकारले आफ्नो प्रस्तुती सकिएपछि फ्यानहरुलाई काखी सुँघाउने गरेकी छिन् । उनले हात उठाएर उभिएको र पुरुष प्रशंसकहरूले उनको काखी सुँघिरहेका तस्बिर इन्टरनेटमा भाइरल भएका छन् ।

ठूला कम्पनी र म्यानेजमेन्टको साथ पाउने स्थापित कलाकारहरूको तुलनामा मात्सुमोतोजस्ता साना र स्वतन्त्र रूपमा काम गर्ने ‘अन्डरग्राउन्ड’ कलाकारहरूको संघर्ष निकै कष्टपूर्ण हुने गर्छ । उनीहरू स-साना थिएटर, सपिङ सेन्टर र लाइभ हाउसहरूमा प्रस्तुती दिन्छन् । उनीहरुले फ्यानहरु बनाउन पनि निकै संघर्ष गर्नुपर्ने हुन्छ ।

मात्सुमोतोको यो हर्कतलाई कतिपयले सीमा नाघेको भन्दै आलोचना गरेका छन् भने कतिपयले यसलाई प्रशंसक खुसी पार्न एउटी कलाकारले गर्नुपरेको संघर्षका चित्रण गरेका छन् । जापानका यस्ता धेरै कलाकारहरूको आम्दानी सामान्य कार्यालयमा काम गर्ने कर्मचारीको भन्दा पनि कम हुने गर्छ ।

यति हुँदाहुँदै पनि उनीहरूमाथि फ्यानलाई आकर्षित गर्ने आफ्नो सुन्दरता मेन्टेन गर्ने दबाब रहन्छ । मात्सुमोतोका करिब ४ लाख फलोअर्स छन् ।