काठमाडौं– भन्सार विन्दुमा आउने तथा स्वदेश मै उत्पादन हुने सबै वस्तुमा अनिवार्य रुपमा एमआरपी अर्थात् अधिकतम खुद्रा मूल्य उल्लेख गर्नुपर्ने सरकारी निर्देशनको कारण विराटनगर भन्सार कार्यालयको भन्सार राजस्व संलकन प्रभावित भएको छ । 

गत वैशाख १५ गते देखि एमआरपी अनिवार्य गरिएपछि विराटनगर भन्सार नाका र भारतीय सीमा क्षेत्रमा करिब ३ सय ५० वटा ट्रक कन्टेनरहरू रोकिएको विराटनगर भन्सार एजेण्ट संघले जनाएको छ । 

भन्सार जाँचपास नभएपछि विराटनगर भन्सार कार्यालयको भन्सार राजस्व पनि प्रभावित भएको छ । दैनिक करिब ११ करोड ३३ लाख रुपैयाँ भन्सार राजस्व संकलन गर्नुपर्ने विराटनगर भन्सार कार्यालयले वैशाख १६ गते ५ करोड १९ लाख, १७ गते बिहीबार ९ करोड ३८ लाख, १८ गते शुक्रवार ६ करोड ४६ लाख रुपैयाँ संकलन गरेको विराटनगर भन्सार कार्यालयका भन्सार अधिकृत विमल साहले जानकारी दिए ।

उपभोक्ता संरक्षण ऐन २०७५ अनुसार वस्तुमा लाग्ने सबै प्रकारका कर समावेश गरी हुन आउने अधिकतम खुद्रा मूल्य अर्थात् एमआरपी उल्लेख गर्नैपर्ने कानुनी व्यवस्था छ । 

आयातकर्ताहरुले भने विदेशबाट आयात हुने वस्तुमा एमआरपी उल्लेख गर्न नसकिने, बरु स्वघोषणा गरी गोदाममा एमआरपी लेखेर बजारमा पठाउन सकिने बताएका छन् ।