काठमाडौं- आईसीसी विश्वकप क्रिकेट लिग २ अन्तर्गत मंगलबारको खेलमा नेपाल ८१ रनले विजयी भएको छ । नेपालले दिएको २५७ रनको लक्ष्य पछ्याएको ओमन ३९ ओभर ५ बलमा सबै विकेट गुमाउँदै १७५ रनमा समेटियो ।

नेपालका लागि गुल्शन झा एक्लैले पाँच विकेट लिए । त्यस्तै, नन्दन यादव, करण केसी, सन्दीप लामिछाने र दीपेन्द्रसिंह ऐरीले समान एक विकेट लिए ।

ओमानका विनायक शुक्लाले ४१ बलमा ३६ रन बनाए । उनले तीन चौका र दुई छक्का प्रहार गरे । त्यस्तै, हमिद मिर्जाले ५१ बलमा ३४ रन जोडे । उनले चार चौका प्रहार गरे । ४३ बलमा २९ रन जोडेका ओमनका हस्नैन उल वहाबले तीन चौका र एक छक्का प्रहार गरे ।

त्यसअघि त्रिवि अन्तर्राष्ट्रिय क्रिकेट रंगशालामा टस जितेर पहिले ब्याटिङ गरेको नेपालले खेल सकिन एक बल अगावै सबै विकेट गुमाएर २५६ रन बनायो । नेपालका आशिफ शेखले सर्वाधिक ९४ रन बनाए । ९७ बलको सामना गरेका उनले सात चौका र पाँच छक्का प्रहार गरे ।

त्यस्तै, अर्जुन कुमालले ८७ बलमा ४८ रन बनाए । उनले चार चौका प्रहार गरे । आरिफ शेखले २४ बलमा ४३ रनको विस्फोटक पारी खेल्दा एक चौका र चार छक्का प्रहार गरे ।

ओमनका लागि नदीम खानले तीन तथा शकील अहमद र हस्नैन शाहले समान दुई विकेट लिए । ओमनका जितन रमानन्दी र आर्यन विष्टले समान एक विकेट लिए ।