काठमाडौं– पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको बन्दीप्रत्यक्षीकरण निवेदनमा आइतबार सुनुवाइ नसकिएपछि हेर्दाहेर्दैमा राखिएको छ।

सर्वोच्च अदालतका न्यायाधीशद्वय विनोद शर्मा र सुनिलकुमार पोखरेलको इजलासमा आइतबार दिनभर बहस भए पनि सुनुवाइ नसकिएपछि हेर्दाहेर्दैमा राखिएको हो ।

यसअघि चैत १६ गते भएको सुनुवाइमा सरकारका नाममा कारण देखाऊ आदेश जारी भएको भएको थियो ।

गत भदौ २३ र २४ गतेको जेन-जी आन्दोलनका क्रममा भएका घटनामा अनुसन्धानका लागि चैत १४ गते पक्राउ परेका ओली र लेखकका तर्फबाट चैत १५ गते बन्दीप्रत्यक्षीकरणको निवेदन दर्ता भएको थियो ।

ओलीका पक्षबाट श्रीमती राधिका शाक्य र लेखकातर्फबाट श्रीमती यशोदा लेखकले रिट हालेका थिए । उनीहरूविरुद्ध जिल्ला अदालतमा म्याद लिएर अनुसन्धान अघि बढिरहेको छ।