काठमाडौं- संघीय संसद्को माथिल्लो सदन राष्ट्रिय सभा उपाध्यक्ष पदमा नेकपा एमालेकी लीला भण्डारी सर्वसम्मत चयन हुने भएकी छन् ।

राष्ट्रिय सभामा र प्रतिनिधि सभामा समेत तेस्रो दल नेकपा एमालेकातर्फबाट भण्डारी उपाध्यक्ष हुन लागेकी हुन्। राष्ट्रिय सभामा प्रतिनिधित्व गरिरहेका दलहरूले एमालेकी भण्डारीलाई सर्वसम्मत उपाध्यक्ष बनाउने सहमति गरेपछि उनले मनोनयन दर्ता गर्दैछिन् ।

उपाध्यक्ष पदका लागि आइतबार मनोनयन दर्ता हुँदैछ, सोमबार निर्वाचन कार्यक्रम छ ।

विमला घिमिरेको कार्यकाल सकिएपछि उक्त पद रिक्त थियो । राष्ट्रिय सभा नियामावली २०७५ को नियम ८ को उपनियम १ बमोजिम उपाध्यक्ष पदको निर्वाचन हुँदैछ।

अहिले राष्ट्रियसभामा दोस्रो दल नेकपाका तर्फबाट नारायण दाहाल अध्यक्ष रहेका छन् । उता प्रतिनिधि सभाको उपसभामुखमा राष्ट्रिय प्रजातन्त्र पार्टीकी खुश्वु ओलीको सम्भावना बलियो छ।

पूर्वराज्यमन्त्री तथा नयाँ शक्ति पार्टीकी नेतृ लीला भण्डारी २०७५ सालमा एमाले प्रवेश गरेकी थिइन्।

२०६४ सालको पहिलो संविधानसभा निर्वाचनमा तत्कालीन नेकपा माओवादीबाट कैलाली ६ मा निर्वाचित भएकी भण्डारीलाई गत फागुन ११ को राष्ट्रिय सभा निर्वाचनमा उम्मेदवार बनाइएको थियो ।