काठमाडौँ – अमेरिकी राष्ट्रपति डोनाल्ड ट्रम्पले इरानमा एफ–१५ ई लडाकु विमान खसालिएपछि बेपत्ता भएका अमेरिकी अधिकारीको उद्धार गरिएको दाबी गरेका छन् ।

ट्रम्पले उद्धार गरिएका अधिकारी ‘सकुशल’ रहेको बताएका छन् । इरानले भने अमेरिकी र इजरायली आक्रमणमा माशह्र पेट्रोकेमिकल क्षेत्रमा पाँच जनाको मृत्यु भएको र १७० जना घाइते भएको जनाएको छ ।

इरानमा लडाकु विमान खसालिएपछि बेपत्ता भएका आफ्ना सैनिक अधिकारीको सकुशल उद्धार गरिएको अमेरिकाले जनाएको हो । उद्धारपछि खुसी व्यक्त गर्दै ट्रम्पले भने, “हामीले उनलाई पायौँ, उनी अहिले पूर्ण रूपमा सुरक्षित छन् ।”

यता इरानले भने अमेरिकी र इजरायली सैन्य बलले गरेको आक्रमणबाट ठुलो मानवीय क्षति भएको दाबी गरेको छ । इरानी अधिकारीका अनुसार माशह्र पेट्रोकेमिकल क्षेत्रमा भएको आक्रमणमा परी पाँच जनाको ज्यान गएको छ भने १७० जना घाइते भएका छन् ।

अमेरिकी सरकारका एक अधिकारीले ‘अल जजीरा’ लाई दिएको जानकारीअनुसार सयौँको सङ्ख्यामा रहेका ‘स्पेसल फोर्स’ सम्मिलित टोलीले भीषण मुठभेडपछि ती अधिकारीको उद्धार गरेको हो । यस उद्धार कार्यबारे इरानले भने अहिलेसम्म कुनै आधिकारिक प्रतिक्रिया दिएको छैन ।