काठमाडौं– नेपालका जीवन बीमा कम्पनीहरूले आर्थिक वर्ष २०८२/८३ मा कुल २ खर्ब ४ अर्ब ५९ करोड ७१ लाख रुपैयाँ बीमा शुल्क संकलन गरेका छन् ।

नेपाल बीमा प्राधिकरणले सार्वजनिक गरेको तथ्यांकले जीवन बीमा कम्पनीहरूले अघिल्लो आर्थिक वर्ष ०८१/८२ को तुलनामा गत आर्थिक वर्षमा झण्डै २२ अर्ब जीवन बीमा व्यवसायमा वृद्धि भएको हो । अघिल्लो आर्थिक वर्षमा जीवन बीमा कम्पनीहरूले १ खर्ब ८२ अर्ब २७ करोड ३३ लाख ४८ हजार रुपैयाँ बराबरको व्यवसाय गरेका थिए ।

गत आर्थिक वर्षमा बीमा व्यवसाय गर्ने १४ जीवन बीमा कम्पनीहरूमध्ये नेपाल लाइफ इन्स्योरेन्स कम्पनी लिमिटेड कुल ५३ अर्ब ६८ करोड ८४ लाख रुपैयाँ बीमाशुल्क संकलन गर्दै पहिलो स्थानमा रहन सफल भएको छ । 

दोस्रो स्थानमा रहेको नेशनल लाइफ इन्स्योरेन्सले २४ अर्ब ६८ करोड ५७ लाख रुपैयाँ र तेस्रो स्थानमा रहेको लाइफ इन्स्योरेन्स कर्पोरेसन (नेपाल) ले २१ अर्ब २३ करोड ३९ लाख रुपैयाँ बीमाशुल्क संकलन गरेका छन् ।

यसैगरी, समीक्षा अवधिमा हिमालयन लाइफले १८ अर्ब ५६ करोड र सूर्यज्योति लाइफले १२ अर्ब ९० करोड रुपैयाँभन्दा बढीको व्यवसाय गरेका छन् ।

प्राधिकरणको तथ्याङ्कअनुसार लघु जीवन बीमातर्फ कुल १ अर्ब २१ करोड ८ लाख रुपैयाँ बीमाशुल्क संकलन भएको छ । त्यस्तै, वैदेशिक रोजगार म्यादी जीवन बीमामार्फत ३ अर्ब ३६ करोड ७० लाख रुपैयाँ संकलन भएको देखिन्छ । असार मसान्तसम्ममा देशभर कुल सक्रिय बीमालेखको संख्या १ करोड ६७ लाख ९२ हजार २३० पुगेको छ ।

बीमा व्यवसायको बिस्तारमा बागमती प्रदेशको हिस्सा सबैभन्दा ठुलो देखिएको छ । बागमती प्रदेशबाट मात्रै ८६ अर्ब ९६ करोड १५ लाख रुपैयाँ बीमाशुल्क संकलन भएको छ ।

अन्य प्रदेशहरूमा, लुम्बिनी प्रदेशबाट ३३ अर्ब रुपैयाँ, कोशी प्रदेशबाट २५ अर्ब १६ करोड रुपैयाँ, गण्डकी प्रदेशबाट २१ अर्ब ३० करोड रुपैयाँ, मधेश प्रदेशबाट १९ अर्ब १३ करोड रुपैयाँ, सुदूरपश्चिम प्रदेशबाट १२ अर्ब ८१ करोड रुपैयाँ र कर्णाली प्रदेशबाट ६ अर्ब २१ करोड रुपैयाँ बीमा कम्पनीहरूले बीमा शुल्क आम्दानी गरेका छन् ।

तथ्याङ्कअनुसार कर्णाली प्रदेशमा बीमाको पहुँच र व्यवसाय अन्य प्रदेशको तुलनामा निकै कम देखिएको छ ।