कञ्चनपुर– कञ्चनपुर प्रहरीले विभिन्न मुद्दामा फरार रहेका दुई जना प्रतिवादीलाई शुक्रबार पक्राउ गरी फैसला कार्यान्वयनका लागि जिल्ला अदालत कञ्चनपुरमा उपस्थित गराएको छ ।

जिल्ला प्रहरी कार्यालयबाट खटिएको प्रहरी टोलीले बहुविवाह मुद्दामा दोषी ठहर भएका नरेशराम विक र पुनःचलनसम्बन्धी मुद्दामा दोषी ठहर भएकी कौशिला चन्दलाई पक्राउ गरेको हो ।

जिल्ला प्रहरी कार्यालयका प्रहरी नायब उपरीक्षक टेकबहादुर रावतका अनुसार विकलाई २०८२ साल असार २० गते अदालतको फैसलाले एक वर्ष तीन महिना कैद र १५ हजार रुपैयाँ जरिवाना तोकेको थियो । त्यसैगरी चन्दलाई २०७९ मङ्सिर १६ गतेको फैसलाअनुसार पाँच हजार रुपैयाँ जरिवाना हुने फैसला भएको थियो ।

पक्राउ परेका दुवै प्रतिवादीलाई फैसला कार्यान्वयनका लागि जिल्ला अदालतमामा उपस्थित गराइएको प्रहरी नायब उपरीक्षक रावतले जानकारी दिए ।