काठमाडौँ – मलेसियामा जारी एसिसी महिला प्रिमियर कपमा अहिले नेपाल भुटानविरुद्ध ब्याटिङ गर्दैछ । मलेसियाको टुङ्कु जाफर क्रिकेट ओभलमामा टस जितेर भुटानले फिल्ड रोजेपछि नेपालले सुरुमा ब्याटिङ गरेको हो ।

आक्रामक बलिङ गरेको भुटानले दुई ओभरको समाप्तिमा दुई विकेट हात पारिसकेको छ । बिन्दु रावललाई शून्यमा गुमाएको नेपालले सम्झना कुमारीलाई १० रन बनाउँदा गुमाएको छ । अहिले क्रिजमा पूजा महतो र सोनी पाख्रिन छन् ।

बुधबार पहिलो खेलमा कतारलाई आठ विकेटले हराएको नेपाल आज दोस्रो खेलमा विजयी हुने लक्ष्यसहित मैदानमा छ ।

बुधबार भएको पहिलो खेलमा कतारले दिएको ७७ रनको लक्ष्य नेपालले दुई विकेटको क्षतिमा भेट्टाएको थियो । नेपालले १० ओभर ५ बलमा दुई विकेटको क्षतिमा ७८ रन बनाउँदै पहिलो जित निकालेको हो ।

प्रतियोगितामा नेपालले अर्को खेलमा शनिबार हङकङसँग प्रतिस्पर्धा गर्दैछ ।