काठमाडौं– लिपुलेक पास हुँदै कैलाश मानसरोवर यात्रा सुचारु गर्ने भारतको निर्णयविरुद्ध संयुक्त विद्यार्थी संगठनले काठमाडौंमा विरोध प्रदर्शन गरेको छ ।

सोमबार माइतिघर मण्डलामा आयोजित प्रदर्शनमा विद्यार्थीहरूले उक्त निर्णयलाई हस्तक्षेपकारी र अतिक्रमणकारी भन्दै आपत्ति जनाएका थिए ।

प्रदर्शनमा सहभागीहरूले चीनको संलग्नता रहेको आरोपसमेत लगाउँदै विरोध जनाएका थिए । उनीहरूले ‘लिम्पियाधुरा, कालापानी, लिपुलेक हाम्रो हो’, ‘ओइ सरकार हाम्रो भूमि खोइ’, ‘भारतीय हस्तक्षेप बन्द गर’, ‘राष्ट्रिय स्वाधीनताको रक्षा गरौँ’ लगायतका नारा लेखिएका प्लेकार्ड प्रदर्शन गरेका थिए ।

विद्यार्थीहरूले नेपालको भूमि अतिक्रमणको प्रयास भइरहँदा सरकार मौन बसेको भन्दै आलोचना गरेका छन् । साथै, उनीहरूले नेपाल, भारत र चीनबीच तत्काल कूटनीतिक संवाद गर्न सरकारसँग माग गरेका छन् ।