काठमाडौं– नेपाल–भारत सीमा क्षेत्रमा १०० रुपैयाँभन्दा माथिका सामानमा भन्सार कर लगाउने नीतिको विरोध गर्दै काठमाडौंमा प्रदर्शन गरिएको छ।

राष्ट्रिय एकता दलको नेतृत्वमा सोमबार माइतिघरमा आयोजित प्रदर्शनमा सहभागीहरूले उक्त मापदण्ड हटाउन माग गरेका हुन्। 

उनीहरूले सीमामा कडाइ गर्दा सीमा क्षेत्रका बासिन्दाले दैनिक उपभोग्य वस्तुमा समेत कर तिर्नुपर्ने बाध्यता रहेको र यसले जीवनयापनमा समस्या उत्पन्न भएको बताएका छन्।

प्रदर्शनका क्रममा सहभागीहरूले ‘सीमामा १०० को नियम हटाऊ’, ‘गरीबको हक अधिकार बचाऊ’, ‘मानव अधिकारको रक्षा गर’ र ‘सीमानाका किसानलाई मल देऊ’ जस्ता नारा लेखिएका प्लेकार्ड प्रदर्शन गरेका थिए।

राष्ट्रिय एकता दलका अध्यक्ष विनय यादवले सीमावर्ती क्षेत्रका नागरिकमाथि अन्याय भइरहेको भन्दै तत्काल १०० रुपैयाँको मापदण्ड खारेज गर्न सरकारसँग माग गरे।