काठमाडौं- सरकारका प्रवक्ता एवम् शिक्षा, विज्ञान तथा प्रविधि मन्त्री सस्मित पोखरेलले नेपाली भूमि लिपुलेकबाट भारत र चीनले खोलेको मानसरोवर मार्गबारे दुवै देशलाई कूटनीतिक नोट पठाएको बताएका छन् ।

सोमबार सिंहदरबारमा बसेको मन्त्रिपरिषद्को बैठकपछि उनले यस्तो बताएका हुन् । पत्रकारले सोधेका थिए, ‘कूटीनीतिक जारी गरिएको भनिएको छ। पब्लिक नोटमात्रै हो या छिमेकीलाई पनि पठाउनु भएको हो?’

जवाफमा उनले भने, ‘भारतसँग सिमाना विवाद छ भन्ने आइसकेको छ। अहिले चीन र भारतले खोल्न लागेको लिपुलेक नेपालको भूमि हो । हामीले कूटनीतिक नोट जारी गरेको भनिसकेपछि पठाएकै हो । भारतले भनेजस्तो नेपालले सीमा विस्तार गर्ने भनेको होइन । त्यो नेपालको भूमि भएकाले सिमा विस्तार भन्ने कुरा आउँदैन ।’

उनले लिपुलेक नेपालको भूमि हो भन्ने कुरामा सरकार प्रष्ट रहेको बताए । ‘त्यो हाम्रो भूमि हो भन्ने कुरामा हामी स्पष्ट छौँ’, उनले भने, ‘हामी हाम्रो अडानमा कायम छौँ।’