काठमाडौं – फिल्म ‘आबाट आमा’को हेरेर दर्शकलाई मानसिक समस्यासमेत परेको दाबी गर्दै निर्माण टिमले उनीहरुसँग माफी मागेको छ ।

फिल्मका लेखक तथा निर्देशक चन्द्र पन्तले विज्ञप्ति नै जारी गरी माफी मागेका हुन् ।

फिल्म हेरेर दर्शक बेहोसमेत भएको उक्त विज्ञप्तिमा दाबी गरिएको छ । लेखिएको छ, ‘हाम्रो फिल्म हेरेर तपाईंहरु रुनुभयो, भक्कानिनुभयो र पुराना पीडाहरु सम्झेर मन दुखाउनुभयो । कतिपय दर्शकहरु फिल्म हेर्दा हेर्दै बेहोस हुनुभएको, कोही बिरामी पर्नुभएको र धेरैलाई मानसिक रुपमा गाह्रो भएको खबर हामीले पायौं ।’

आफूहरुको उद्देश्य दर्शकलाई यस्तो कठिनाइमा पार्ने नभएको पन्तले स्पष्ट पारेका छन् ।

उनले अगाडि लेखेका छन्,‘जब फिल्मको कथा आफ्नै जीवनको कथा जस्तो लाग्छ, तब मन थाम्न गाह्रो हुँदो रहेछ ।’

अर्थात्, फिल्मको कथा फिल्म बहुसंख्य दर्शकसँग मिल्ने उनको दाबी हो ।

माघ १६ बाट प्रदर्शनमा आएको यो फिल्मले आमा–छोराको सम्बन्धको कथा भन्छ । नायक पल शाह, नायिकाहरु उषा उप्रेती र सिम्रन पन्त शीर्ष भूमिकामा छन् ।