काठमाडौं – ‘समृद्ध चलचित्रका जगतका लागि दक्ष चलचित्रकर्मी’ बनाउने उद्देश्यका साथ चलचित्र विकास बोर्डले एक साताको ‘हर्स राइड’ तालिम दिने भएको छ ।

फिल्ममा सक्रिय कलाकारहरुका लागि बोर्डले माघ २४ देखि ‘घोडाचढी’ तालिम दिने भएको हो ।

बोर्डका अध्यक्ष दिनेश डीसीका अनुसार फिल्ममा घोडा चढ्ने दृश्य छायाङ्कनका लागि सहज होस् भन्ने उद्देश्यले यो तालिम राखिएको हो ।

उनी भन्छन्, ‘फिल्मका लागि घोडा चढ्नुपर्ने दृश्य आउन सक्छन् । यसका लागि तयार गर्न बोर्डले सक्रिय कलाकारलाई तालिम दिन लागेको हो । एक साताको तालिमले उहाँहरुले स्टन्ट गर्न त सक्नुहुन्न । तर, घोडा कुदाउन भने सक्नुहुन्छ ।’

यो तालिममा सक्रिय कलाकारहरु नै इच्छुक देखिएको उनले बताए ।

उनका अनुसार नायकहरु सरोज खनाल, विजय बराल, नाजिर हुसेन, शिरि वाङदेल र नायिका केकी अधिकारीलगायत सहभागी हुनेछन् ।