काठमाडौं – राष्ट्रिय स्वतन्त्र पार्टीले काठमाडौं क्षेत्र नम्बर ८ बाट आसन्न प्रतिनिधिसभा निर्वाचनका लागि विराजभक्त श्रेष्ठको एकल सिफारिस गरेको छ। पार्टीको आज बसेको काठमाडौं क्षेत्र नम्बर ८ समितिको बैठकले यस्तो निर्णय गरेको नेता महेन्द्र शर्माले जानकारी दिए। शर्माका अनुसार श्रेष्ठलाई सर्वसम्मत रूपमा एकल सिफारिस गरिएको हो।

श्रेष्ठ राष्ट्रिय स्वतन्त्र पार्टीमा यसअगाडि संसदीय दलको उपनेता थिए। पार्टी सभापति रवि लामिछाने कारागार चलान भएपछि उनैले संसदीय दलको जिम्मेवारी सम्हालिरहेका थिए।

२०७४ सालको निर्वाचनमा समानुपातिक रुपमा विवेकशील साझाबाट बागमती प्रदेशको सदस्य समेत भएका श्रेष्ठ २०७९ को निर्वाचनमा भने राष्ट्रिय स्वतन्त्र पार्टीबाट विजयी भएका थिए।

२०७९ को निर्वाचनमा काठमाडौं क्षेत्र नम्बर ८ बाट उनले अभियन्ता सुमन सायमीसँग चुनावी प्रतिस्पर्धा गरेका थिए। प्रतिस्पर्धामा श्रेष्ठले १०,१०५ मत ल्याएर विजय हासिल गरेका थिए भने सायमीले लौरो चुनाव चिन्हबाट ५ हजार ८७९ मत ल्याएका थिए।

काठमाडौँ क्षेत्र नम्बर ८ मा राम्रो पकड बनाएका श्रेष्ठले यसपटक पनि बाजी मार्ने रास्वपाले आकलन गरेको छ। २०७९ को निर्वाचनमा श्रेष्ठसँग भिडेका सायमीलाई काठमाडौँ क्षेत्र नम्बर ८ र ९ बाट राष्ट्रिय मुक्ति पार्टी नेपालले यस अगाडि नै सिफारिस भएका छ्न । यहाँबाट श्रेष्ठ सिफारिस भएपछि सायमी ९ बाट चुनाव लड्न सक्ने आकलन धेरैको छ ।

यता पहिलो दल नेपाली कांग्रेसले यसअगाडि सपनाराज भण्डारी जोशीलाई सिफारिस गरिसकेको छ ।