काठमाडौं- बलिउड चर्चित बलिउड अभिनेता अनिल कपूरले आफ्नो फिल्म ‘नायक : द रियल हिरो’ को अधिकार आफैँले खरिद गरेका छन्। सन् २००१ मा रिलिज भएको यो फिल्म २५ वर्षपछि फेरि चर्चामा आएको छ।

बलिउड हंगामाको रिपोर्टअनुसार, अनिल कपूरले फिल्मको अधिकार लिएसँगै यसको सिक्वेल बन्ने सम्भावना बलियो भएको बताइएको छ। पहिले निर्माता दीपक मुकुटसँग रहेको अधिकार हाल अनिल कपूरको हातमा आएको हो।

स्रोतका अनुसार, ‘नायक’ अनिल कपूरको करियरको एक विशेष फिल्म भएकाले उनी यसको कथा अगाडि बढाउन इच्छुक छन्। दर्शकबाट लामो समयदेखि पाएको माया र कथाको समसामयिक महत्वलाई मध्यनजर गर्दै सिक्वेलको योजना अघि बढ्न सक्ने चर्चा छ।

फिल्म ‘नायक’ मा अनिल कपूरले २४ घण्टाका लागि मुख्यमन्त्री बन्ने साधारण व्यक्तिको भूमिका निभाएका थिए, जसले राजनीतिक व्यवस्थामाथि प्रश्न उठाउँछ। फिल्म समयसँगै कल्ट क्लासिक बनेको थियो। यसमा रानी मुखर्जी, परेश रावल र जॉनी लिभरले पनि महत्वपूर्ण भूमिका खेलेका थिए।