काठमाडौं – नायिका विपना थापा र नायक पल शाह शीर्ष भूमिकामा रहेको फिल्म ‘आँबाट आमा’मा समावेश गीत ‘लैजा खबर ए हावा’लाई नेवारी भर्सनमा सार्वजनिक गरिने भएको छ ।

प्रचारमा नेवारी समुदायका दर्शकहरुलाई समेट्ने हेतुले यो गीत निकाल्न लागिएको हो । निर्माण पक्षका अनुसार नेवारी भर्सनको गीतमा यमन श्रेष्ठले स्वर दिने भएका छन् ।

अहिले युट्युबमा चर्चामा रहेको यस गीतको नेवारी भर्सनमा स्वर दिएका यमन दर्शकबाट प्रतिक्रियाको पर्खाइमा छन् ।

उनले भने, ‘यो गीतलाई मैले युट्युबमा सुनिरहेको थिएँ । टिमबाट मलाई यो गीत नेवारी भाषा गाउन अफर गर्नुभयो । नेवारी भाषामा पनि अनुवाद गर्न मलाई नै लगाउनुभयो ।’

आफ्ना बुवा कलाकार मदनकृष्ण श्रेष्ठले अनुवादमा पाटो हरेको उनले खुलाए । उनले भने, ‘मैले बुवाले यो गीतको अनुवाद गर्न लगाएँ । बुवाले नै नेवारी भाषामा गीत तयार गरिदिनुभयो । नेवारी भाषा मेरोभन्दा उहाँको राम्रो छ ।’

‘लैजा खबर’को ओरिजिनल भर्सनमा गायक रवि ओडको स्वर रहेको छ । शब्द र संगीत भने बाबुल गिरीको हो ।

आर्या इन्टरटेन्मेन्टको ब्यानरामा बनेको यस फिल्ममा भारतीय कलाकार प्रदीप रावत, उपा उप्रेती, सिम्रन पन्त, साइग्रेस पोखरेललगायतको अभिनय रहेको छ ।

फिल्ममा कृष्णप्रसाद सुबेदी, ओमकार पन्त, प्रकाशजंग कुँवर, ध्रुव प्रसाद न्यौपाने र क्षितिज ढुंगानाको लगानी रहेको छ । माघ १६ बाट प्रदर्शनमा आउने यस फिल्मको निर्देशक चन्द्र पन्त हुन् । पन्तले गत वर्ष प्रदर्शजमा आएको फिल्म ‘ह्रस्व दीर्घ’बाट निर्देशनमा डेब्यू गरेका हुन् ।