काठमाडौँ – राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले मुलुकको स्थिति लिकभन्दा बाहिर गएको र विद्यमान राजनीतिक समस्या पात्रमा मात्र नभई व्यवस्था र संविधानमै रहेको टिप्पणी गरेका छन्।

नेपाली कांग्रेसको १५औँ महाधिवेशनको उद्घाटन सत्रलाई आइतबार काठमाडौँको खुलामञ्चमा सम्बोधन गर्दै अध्यक्ष लिङ्देनले गलत कुरा औँल्याउँदा प्रहार हुने प्रवृत्ति अझै कायम रहेको बताए।

“हिजो एउटा कुनै समय थियो, कसैको विरोध गर्‍यो भने गोली आउँथ्यो; आज गलत कुरा कसैले औँल्यायो भने सामाजिक सञ्जाल आइलाग्छ,” उनले भने, “पात्र फेरिएका छन्, तर प्रवृत्ति भने फेरिएको छैन।”

सम्बोधनका क्रममा अध्यक्ष लिङ्देनले देशमा विद्यमान समस्या व्यक्तिविशेषमा मात्र सीमित नरहेर व्यवस्था र संविधानमै रहेको जिकिर गरे। उनले राजनीतिक दलहरूलाई आत्मालोचित हुँदै देशलाई सही बाटोमा ल्याउन र संविधानका त्रुटिहरूमाथि पुनर्विचार गर्न आग्रह गरे।