काठमाडौं- नागरिक उन्मुक्ति पार्टीका संरक्षक रेशमलाल चौधरीले नेपाली कांग्रेसको १५ औँ महाधिवेशनको उद्घाटन सत्रलाई सम्बोधन गर्दै नेपालको राजनीतिक र न्यायिक प्रवृत्तिको तीखो आलोचना गरेका छन् । सम्बोधनका क्रममा उनले जनताबाट अत्यधिक मत पाएर लोकप्रिय बनेका जनप्रतिनिधिहरूलाई विभिन्न बहानामा कारागार पुर्‍याइने गरेको टिप्पणी गरे ।

सम्बोधनको क्रममा संरक्षक चौधरीले राष्ट्रिय स्वतन्त्र पार्टीका सभापति रवि लामिछाने कारागारमा रहँदा आफूले भैरहवा र नक्खु कारागारमा पुगेर भेटेको प्रसंग उल्लेख गरे । सोही भेटघाट र आफ्नै कारागार जीवनको भोगाइलाई जोड्दै उनले महाधिवेशनको मञ्चबाटै एउटा मार्मिक एवं व्यङ्ग्यात्मक गीत समेत गाएर सुनाए ।

उनले मञ्चबाट गीत गाउँदै भने, “चार दिवारमा थुनिएर आजभोलि मन्द छु, धेरै भोट पाएर होला झ्यालखानामा बन्द छु । छातीमा छ लोगो सांसद पदको, बाटो देखायो सरकार कालो कोठरीको । चार दिवारमा थुनिएर आजभोलि मन्द छु, धेरै भोट पाएर होला झ्यालखानामा बन्द छु ।” चौधरीले यो गीत गाइरहँदा महाधिवेशन स्थलमा उपस्थित सहभागीहरूले ताली र हुटिङका साथ समर्थन जनाएका थिए ।

गीतमार्फत आफ्नो र समकालीन लोकप्रिय नेताहरूको पीडा पोखेपछि चौधरीले नेपालमा धेरै लोकप्रिय हुँदा र जनताले धेरै मन पराउँदा जाने बाटो झ्यालखाना नै रहेछ भन्दै व्यङ्ग्य गरे । जनताको अभिमतबाट निर्वाचित भएर छातीमा सांसदको लोगो लगाउनेहरूलाई नै सरकारले कालो कोठरीको बाटो देखाउने गरेको उनको गुनासो थियो ।